ITOOPHIYAAN ISHEE KAMII!

            ITOOPHIYAAN ISHEE KAMII?

==============================

“Itoophiyaan ariifattee haka ishee gara Waaqayyootti in

hiixatti.” (Faarfannaa 68:31)

Macaafoota Qulqulluu zamana keenyatti argannu keessatti

jechi “Itoophiyaa/Itoophiyaanoota” jedhu iddoowwan heddu

irratti tuqameera. 

Kanneen gidduuyis keeyyanni Faarfannaa

Daawit 68:31 irra jiruu fi “Itoophiyaan ariifattee harka ishee

gara Waaqayyootti in hiixatti” jedhu keessattuu biyya keenyatti

akka dhaadannootti baldhinnaan faayidaa irra ooleera. Biyya

teenyatti kanneen argaman Kiristaannoonni tokko tokkoofi

mootota durii biratti ejjannoo “Itoophiyaan iddoolii

Kiristaanaati” jedhu irra akka gahaniif kanaa fi keeyyattoonni

fakkaataawwan shoora mataa isaanii gumaachaniiru. “Macaafa

Qulqulluu keessatti tan tuqamte biyyiti teenya tun Itoophiyaan

Waaqayyoon irraa tan nuuf kennamte biyya qulqullittii

(eebbifamtuu) dha” ilaalchi jedhu uumameera. Ilaalchichis

kanuma qofa irratti osoo hin dhaabbatin seenaa keenya

keessatti keessattuu mootootaaf mija’insa amantaawaa

uumuudhaan yommuu badiiwwan heddu dhaqqabsiisu xiinxallameera.

Armaan olitti kan tuqne keeyyanni Faarfannaa Daawitii fi

keeyyattoota Macaafa Qulqulluu biroowwanis himtee wajjiin

tokkummaadhaan biyyattiin tan Kiristaanaa (“Tan isaanii qofa”)

akka taate akka itti dhageessisu gargaareera. Tokko tokko

oftuuluudhaan goolabbiiwwan “Dachattiinis Kiristaanaa”,

“Xiyoona” kkf jedhan irra gahaniiru. Isaannan biroo immoo

“Itoophiyanummaan kan argamu dhalootaan osoo hin taane

cuuphamaan” yommuu jedhanis caqafamaniiru. Kan barreessanis dubbifneerra. Gochi isaanii kunis

Itoophiyaanummaa Muslimootaatii fi lammiilee Kiristaana hin

ta’in birootis ganuuf agarsiisa guddaadha. 

Holola kana fakkaatuunis matuma isaa “Itoophiyaanummaa” hanga jibbuu

kanneen gahan Muslimoonni muraasa hin jedhamne akka jiran

barreessaan kitaaba kanaa ni amana. Kanaafuu barreeffama

kanaan qaama amantii isaanii hamma ta’uu tan geettee fi

“Itoophiyaan” harka ishee ariifattee gara Waaqayyoo akka

hiixattu tan himameef tamiin akka taate baldhinnaan

sakattaana.

“Itoophiyaa” Mafaaca Qulqulluu

*****************************************

Seenaa Itoophiyaa keessatti durduriiwwan hedduu fi

aadbuureewwan (hypothesis) ragaa amansiisaa hin qabne

hamma dhugaa beekamtii argataniiru. Himteewwan hunde-

dhabeeyyii ta’an dhugaa fakkaatanii dhihaataniiru. Dhugaallee

dhiibaniiru. Akkasumas seenaa Itoophiyaa keessattii ta’iiwwan

heddu Macaafa Qulqulluu wajjiin walqabatanii dhihaataniiru;

seeneffamanii jirus. Kanneen gidduuyis isa tokko mata-duree

kanaan ni ilaalla.

Akkuma beekamu Mafaacni Qulqulluun Kakuu Moofaa fi Kakuu

Haara jechuudhaan bakka lamatti qoodama. Kakuun Moofaan

Dhaloota Kiristoosin dura kan barreeffame kitaaba

Ayhuudootaa yoo ta’u Kakuun Haaraan immoo Dhaloota

Kiristoosiin booda kan barreeffame kitaaba Kiristaanootaati.

Waa’ee Kakuu Moofaa hayyooliin Kiristaanaa akkana

jechuudhaan barreessaniiru:

“Kakuun Moofaan kitaaba umrii dheeraa qabuudha. Naannawa

woggaa addunyaa 1400tti Muuseen kitaabottan shanan

jalqabaa barreessuu eegale. Kunis hamma woggoota 3500 tiin

duratti jechuudha. Kitaabni Kakuu Moofaa inni xumuraa kan

barreeffame naannawa woggaa addunyaa 400tti ture.” (Tiim

Felos, Kutaa fi Ibsa Qorannoo Kakuu Moofaa, Kitaaba 1ffaa,

Kutaa Hog-barruu SIM, Kitaaboota Macaafa Qulqulluu Bu’uura

Godhatan, Finfinnee, 1998, Fuula 12)

Hiikkaa Macaafa Qulqulluu Amaariffaa, Oromiffaa fi Ingiliffaa

keessatti jechi “Itoophiyaa” jedhu ni argama. Haata’u malee

Kakuun Moofaan kan ittiin barraaye Macaafa Qulqulluu lugaa

Ibraayisxii keessa iddoodhuma tokko irrattuu jechi “Itoophiyaa/

Itoophiyaanota” jedhu hin argamu. Bakkabu’a jecha

“Itoophiyaa/ Itoophiyaanota” jedhu kanaan kan hiikkame

Macaafa Qulqulluu Ibraaysixii keessatti jechi argamu jecha

“Kuush/Kuushota” jedhuu dha.( Barnes’ Notes, Bible

Commentary, Electronic Database, Copyright © 1997 by Bible

soft; The New Unger’s Bible Dictionary Originally Published by

Moody Press of Chicago, Illinois, Copyright © 1988)

Jechi “Itoophiyaa” jedhu jecha Giriikii yommuu ta’u hiikkaan

isaa fuulli isaanii aduudhaan (gubatee) kan gurraachate

jechuudha.( E.A. Walls Budge, A History of Ethiopia, Nubia and

Abyssinia, Volume One, 1928, Page 5)

Jechi “Itoophiyaa” jedhamu yeroo jalqabaatiif akka

moggaasaatti kan kenname Dhaloota Kiristoosiitiin Dura

jaarraa dhibba 4ffaa keessa ture. Moggaasa isaannan aduun

gubatanii gurraachatan jechuudhaaf lugaa Giriikiitiin

“Itoophiyaa” jechuun maqaa kan itti moggaase Maanitoo

(Manetho) ture. Maanitoon hayyuu seenaa lammii Gibxiitii fi

luba (kaahna) ture. Maanitoon biyya Suudaaniitti hundeeffamee

kan ture hidda mootummaa Kuushii “Hidda Mootummaa

Itoophiyaa” (Ethiopian Dynasty) jechuudhaan waame.

Moggaasni Maanitoon kenne biyya Suudaanii (Nubiyaa) irraa

ka’uudhaan woggaa addunyaa 713 (727) Gibxiin too’atee

hanga woggaa addunyaa 633tti hidda mootummaa bulchaa

tureetiif ture. Insaaykiloopidiyaan Itiyoophikaa akkanatti ibsa:

“Kan Maanitoo (kan inni moggaase) hiddi mootummaa

Itoophiyaa, Itoophiyaa har’aa wajjiin wanti walitti fidu homaa

hin jiru. Kan durii moggaasni ‘Itoophiyaanoota’ jedhu kan

kennameef halluu gurraacha qabaataa kan turan hooggantoota

Nubiyaatiif ture. … Itoophiyaa har’aa wajjiin burjaaja’iinsa

kamiinuu hanbisuudhaaf (Itoophiyaa kan jedhu kan

kennameef) moggaasa isaa kan Macaafa Qulqulluutiin ‘Kuush’

jedhamaa kan ture hidda mootummaa Gibxii (Nubiyaa) 25ffaaf

kan jedhuudhaaf.” (Encyclopedia Aethiopica, Volume Two,

Page 405)

Gibxiin Kuushiin naannawa woggaa addunyaa 1520tti too’atte.

Jaarraawwan shaniin booda woggaa addunyaa 1070tti Kuush

bilisa baate. Kuush mootummaa walabooftuu taatee Jabal

Barkaatti Naapootaatti hundeeffamte. Sadarkaa olaanaadhaan

dhiibbaa aadaa Gibxii jalatti kuftee kan turte yoo ta’u Gibxiin

keessatti gabbaramaa kan ture Taaboonni Aamuun jedhamus

ishee keessatti waaqeffatamaa ture.( Encyclopedia Aethiopica,

Volume Three, Page 459)

Armaan olitti akkuma tuqametti Gibxii fi Kuushiin (Itoophiyaan)

ollummaa qofa osoo hin taane tokko kan biroo hamma

bulchuutti seenaa fulla’e qaban. Akaakuun Piiraamiidii Gibxiitis

Kuushiin keessatti (Itoophiyaa Suudaanii) keessatti ijaarameera.

Macaafa Qulqulluunis Gibxii fi Itoophiyaan

(Kuush) irra deddebi’amuudhaan tokkummaan waamamaniiru.

Fakkeenyaafis:

“Tiirhaaqaan mootiin Itoophiyaa isa loluudhaaf dhufaa akka jiru

Senaaheriib yommuu dhaga’e, Hisqiyaas mootii Yihudaatti

namoota ergee, …” (Moototaa Isa 2ffaa 19:9)

“Tiirhaaqaan mootiin Kuush isa loluudhaaf dhufaa akka jiru

Senaaheriib yommuu dhaga’e, Hisqiyaasitti namoota ergee,

…” (Isaayaas 37:9)

Dursinee akka ibsinetti Gibxiin woggaa addunyaa 1520tti

Kuushiin too’attee woggaa addunyaa 1070tti Kuush

bilisummaa ishee gonfattee jirti. Isheenis dabaree isheetiin

humni ishee jabaataa yommuu adeemu Gibxiin too’attee

hoogganuuf dandeettee jirti. Isuma kana Ministeerri Barumsaa

Ifeedirii barattoota kutaa jahaatiif kitaabni barnootaaf

qopheesseefiif akkanatti ibsa:

“Magaalaan guddoon mootummaa Kuushii tan jalqabaa

Naapootaa jedhamaa turte. 

Gidduu woggaa addunyaa 8ffaa fi

7ffaa giddutti mootummaan Kuush jajjaboo ta’ee akka ture

ragaaleen seenaa ni eeru. Zamana kanatti mootummaan Kuush

kutaa bulchiinsa isaa babaldhifatuudhaan Gibxii durii dabalatee

bituu danda’ee ture.”

(Ministeera Barumsa Ifeedirii, Saayinsii Hawaasaa, Kitaaba

Barataa, Kutaa 6ffaa, Maxxansaa 1ffaa, 2003, Dhaabbata

Maxxansaa fi axxansiisaa Al-Goreer, Dubaay, Gurmuu

Emereeta Arabaa, Fuula 6)

Dhaloota Kiristoosiitiin duratti woggaa addunyaa 200tti Kakuun

Moofaan Ibraayisxiin irraa gara lugaa Giriikii hiikkame. Hiikkaan

kunis Septuwaajent jedhamuudhaan kan beekkamu yoo ta’u

yeroo jalqabaatiif hiikkaa kanaan jecha Ibraayisxii isa “Kuush”

jedhu jechi Giriikii “Itoophiyaa” jedhu bakka bu’e. (Tiim Felos,

Fuula 14)

Gabaabumatti lugaa Ibraayisxii isa Kakuu Moofaan jalqaba

itttiin barraaye keessatti iddoo tokko irrattis jechi “Itoophiyaa”

jedhu kan hin jirre yommuu ta’u kan jirus Macaafa Qulqulluu

hiikkaa Giriikii keessatti. Gibxiin gara Kibbaatti Suudaanii

har’aa keessa tan turte “Mootummaa Kuushii” gurraachota

wanta turaniif Giriikonni gurraachummaa jaraa ibsuudhaaf

(fuulli isaanii aduudhaan gubatee kan gurraacha’e jechuudhaaf)

lugaa ofiitiin “Itoophiyaanoota” jedhaniin. Macaafni Qulqulluun

(Kakuun Moofaan) Ibraaysixiin irraa gara Giriikitti yommuu

hiikkamutti iddoo waa’ee Kuushiitii fi mootummaa fi ummata

Kuushootaa dubbatu irratti lugaa Giriikiitiin jechi “Itoophiyaa”

jedhu wanta baratameef “Kuush” Itoophiyaa kan jedhuun

hiikkame. Hayyuun amantii Kiristaanaa Tiim Felos isuma kana

akkanatti ibsa:

“Itoophiyaa ykn Kuush: Macaafa Qulqulluu Ibraayisxii keessatti

Gibxiin gara Kibbaa irratti biyyi itti aanee argamu Kuush

jedhamee waamamaa ture. Booddee irrattis Macaafa

Qulqulluu Giriikii Septuwaajent keessatti Giriikonni dachii tana

Itoophiyaa jedhanii waaman. Kanaafuu, Macaafa Qulqulluu

keessatti Kuushii fi Itoophiyaan maqaalee lamaan bakka

tokkoo turan. Hiikkaawwan Macaafa Qulqulluu Ingiliffaa,

Amaariffaa fi Oromiffaa dachii tanaaf “Itoophiyaa” kan jedhu

maqaa Giriikii fayyadamu.

Dachiin Kuushii ykn Itoophiyaa, Itoophiyaa ammaa wajjiin

tokkoo miti. Haata’u malee seenaa addunyaa keessatti

“Nubiyaa” jedhamaa waamamaa tan turte biyya har’a Kaaba

Suudaanitti argamtuudha. Akkaataa taa’umsaa lafaa Macaafa

Qulqulluu irratti hundaa’uudhaan Nubiyaan biyya kutaa Kibbaa

irratti argamtu tan xumuraati. Itoophiyaan ammaa jalqabarratti

maqaa ishee kan argatte Macaafa Qulqulluu Giriikii irraay.

Haata’u malee iddoo/bakka Macaafni Qulqulluun Itoophiyaa

ykn Kuush jedhee waame irraa guutumaan guututti

walfakkaattuu miti.

(Tiim Felos, Damee fi Ibsa Qu’annoo Kakuu Moofaa, Kitaaba

1ffaa, Fuula 68)

Hayyuun seenaa Bajji akkana jechuudhaan barreesseera:

“The country of the ‘burnt faces’ is none other than the

‘Sudan’. (Biyyitti namoota fuulli jaraa gubatee tan biroo osoo

hin ta’in Sudaaniidha.)”

(A History of Ethiopia, Nubia and Abyssinia, Vol. 1, Page 5)

Maanitoon yeroo jalqabaatiif

lugaa Giriikiitiin moggaasa “Itoophiyaa” jedhu kan itti

fayyadame dhaloota Kiristoosiin dura jaarraa dhibba 4ffaa

keessa ture.

Barreessitoonni Giriikootaa durii waa’ee hidda

mootummaa Kuushii (Itoophiyaa) ilaalcha yaadinsa

maalalchiisaa fi dinqisiisaan guuttame qabaataa turan.

Intarnaashinaal Istaandard Baaybil Insaaykiloopidiyaan akka

jedhutti Giriikoonni durii Gi’ogiraafii Itoophiyaa hubachuun

isaan dhibee Itoophiyaan daangaan ishee hanga Hindii akka

gahu nibarreessuu ture. (International Standard Bible

Encyclopedia, Electronic Database Copyright © 1996 by Bible

Soft)

Akkuma kanatti bitaa ittita’uu irraa kan ka’e Itoophiyaa

(teenya) tan har’aa yommuu “Hindi” jedhanii waamanis ni

dubbifna. Lagni Abbaayaa akka Itoophiyaa har’aa irraa ka’u

ibsuudhaaf jaarraa dhibba tokkoffaa dhaloota Kiristoosiin dura

Diyoodorasiin Sisiilii “Lagni Abbaayaa kan ka’u Biyya Hindii

irraayi” jechuudhaan barreesseera. (Encyclopedia Aethiopica,

Volume 3, Page 146)

Macaafa Qulqulluu keessatti “Kuush” jedhamaa tan

waamamtee fi lugaa Giriikiitiin hiikkaa “Itoophiyaa” jedhu tan

argatte mootummaa Kuushii (Itoophiyaa) hayyooliin seenaa

yeroowwan sadihitti qoqqoodu. Isaanis kan Naapaataa

(woggaa addunyaa 751-542), kan Meeroy (woggaa addunyaa

542 hanga Dh.K.B 339/350) fi Garee Eksii (X-Group) fa’aadha.

( Frank M. Snowden, Blacks in Antiquity: Ethiopians in the

Greco-Roman Experience, Page 113)

Macaafni Qulqulluun Seera Uumamaa 10:6 irratti akka ibsetti

Kuush ilmaan Haam gidduu isa tokko ture. Innis dabaree

isaatiin ilmaan Saaba, Ewulaax, Sabtaa, Raa’imaa fi

Sabaqaataa jedhaman dhalfate. Ilmaan (sanyiiwwan) Kuushii

gara kutaa addunyaa adda addaatti kan bibbittinaayan

yommuu ta’u saboonni Kuushii akkanuma Suudaaniin

keessattis hawaasa guddaa ta’anii turan. Armaan olitti akka

tuqametti Gibxoonni Kuushiin naannawaa woggaa addunyaa

1520tti too’atanii jaarraawwan shaniin booda woggaa

addunyaa 1070tti Kuush bilisa baatee jirti. Kanaan booda hiddi mootummaa Kuushii hundeeffameera.

 (Morkot, Roger G. “On

the Priestly Origin of the Napatan Kings: the Adaptation,

Demise and Resurrection of Ideas in Writing Nubian History” in

O’connor, David and Andrew Reid, eds, Ancient Egypt in

African (Encounters with Ancient Egypt) (University College

London Institute of Archaeology Publication, Page 151)

Naannawa woggaa addunyaa 727tti hiddi mootummaa Kuushii

mooticha Piiyanin (Piye) hidda mootummaa Gibxii 25ffaa

weerare. Hanga woggaa addunyaa 653ttis Gibxiin bite. Iddoon

taa’umsi hidda mootummaa Gibxii isa 25ffaa kanaa Naapaataa

(Napata) Suudaan ture. Yeroo Piiya fi Tirhaaqitti hiddi

mootummaa kun sanqii (haraatii) guddinaa irra gahee ture.

Tirhaaq umrii isaa walakkaa Gibxiin bituun kan dabarse yoo

ta’u Asoraawiyoota wajjiinis walworaaneera. Woggaa

addunyaa 674tti Isaahardoon kan durfame woraana

weerartootaa kan Osoriyootaa injifateera. Ta’us woggoota

sadihiin booda injifatamee Gibxiin gad furee bahuuf

dirqamame.( Kendall, T.K. Napatan Temples; a case study

from Gebel Barkal. The mythological Nubian Origin of Egyption

Kingship and the formation of the Napatan state. 10th

International conference of Nubian Studies, 2002)

Kuush (lugaa Giriikiitiin Itoophiyaa) yeroo Gibxiin itti bitaa turte

kanneen dubbatan keeyyattoonni Macaafa Qulqulluu nijiru.

Fakkeenyaaf waa’ee Tirhaaq akkanatti tuqameera:

“Tiirhaaqaan mootiin Itoophiyaa isa loluudhaaf dhufaa akka jiru

Senaaheriib yommuu dhaga’e, Hisqiyaas mootii Yihudaatti

namoota ergee, …” (Moototaa Isa 2ffaa 19:9)

“Tiirhaaqaan mootiin Kuush isa loluudhaaf dhufaa akka jiru

Senaaheriib yommuu dhaga’e, Hisqiyaasitti namoota ergee,

…” (Isaayaas 37:9)

Macaafni Qulqulluun Macaafa Lakkoobsaa boqonnaa 12

lakkoofsa tokko irratti akka ibsutti Nabi Muusaan (Muuseen)

(nageenyi isa irratti haabu’uu) yeroo Gibxiin ittituretti haadha

warraa lammii Kuushii (Itoophiyittii) fuudheera. Taa’uumsi

hidda mootummaa Kuush Naapaataan woggaa addunyaa

300tti gara Meeroy jijjiirame. Insaaklopidiyaan Itiyoophikaa

jaldii 3ffaa fuula 936-937 irratti akka ibsetti Meeroy kan

argamtu magaalaa guddittii Suudaanii tan har’aa Kaartuumiin

irraa gara Kaabaatti kiloo meetra 180 fagaatteeti. Amma hojii irra kan jiru Saayinsiin Hawaasaa kan kutaa jahaa kitaabni

barataatis waa’eedhuma kanaa barreesseera.

Naapotaatti aantee magaalaa guddoo mootummaa Kuushii tan

turte Meeroy naanna’a Kaartumii har’aa akka turte akkanatti

ibsa:

“Woggaa addunyaa 666n booda mootummaan Kuushii

bulchiisa isaa gara Kibbaa babaldhisuu akka jalqabe beekuuf

danda’ameera. Magaalaan guddittiin mootummichaatis gara

qarqara dhiha laga Naayilii jijjiiramee ture. Magaalaan

guddoon tun Meeroy jedhamuun beekkamtii turte. Meeroyiin

yeroo sanii Kaartuumii ammaa irraa gara Kaabaatti fageenya

kiloo meetra 150 irratti argamaa turte. Kutaa bulchiinsa

haarawaan qaroominni Kuushii woggaa kuma tokkoon ol turuu

danda’eera. Qaroominnis qaroomina Meeroy jechuudhaan

beekkamaa ture.” (Saayinsii Hawaasaa Kitaaba Barataa, Kutaa

6ffaa, fuula 7)

Dhiibbaa Gibxii irraa kan ka’e Meerooyin keessatti

Piiraamidoonni lakkoofsi isaanii dhibba lamaa (200) ol ta’an

hojjetamaniiru. Piiraamidoonni kunniin akaakuu sadihitti

kanneen qoqqoodaman yommuu ta’an hayyooliin “Nubian

Pyramids” jechuudhaan waamu. Piiraamidonni kunniin

hammamtaan Piiraamiidottan Gibxii irraa adda jiru.

Ministeerri Barnoota Ifeedirii kan qopheesse kitaabni barataa

Piiraamidottan kan hojjetaman akka reeffi moototaa keessatti

boqachiisuudhaaf ta’e akkanatti ibsa:

“Suudaanii durii keessatti ummattonni Kuushii reeffa moototaa

boqachiisuuf akka isaaniif mijaa’uuf Piiraamidoota hojjetanii

turan. Piiraamidoonni kunniin Merooyiin keessatti

argamu.” (Saayinsii Hawaasaa Kitaaba Barataa, Kutaa 6ffaa,

fuula 7)

Teessoo mootummaa Kuushii tan turte Merooy mootittiiwwan

heddu qabaataa tan turte yoo ta’u hundinuu maqaa isaanii kan

waliitiin “Kindaakee” (Hindaakee) kan jedhuun waamamaa

turan. Kindaakeewwan (mootittiiwwan) Merooyiin keessa turan

gidduu woggaa addunyaa 345-332 tan mootomte Pelek irraa

kaasee akka Laahidimaanii kanneen turan gidduu eenyummaan

kudha tokkanii beekkamuuf danda’meera. Kanneen gidduu

Hojii Ergamtootaa boqonnaa saddeet lakkoofsa 27 irratti

waa’ee mootittii Kuushotaa (Itoophiyaanotaa) Kindaakee kan

himu odeeffannoon Arkiyooloojjii Suudaan Kaagaa keessatti

argameera. Intarnaashinaal Baayibil Istaandard Insaaklopidiyaa

fi Wikipidiyaan akka ibsanitti A.L.A 1834 Juseeppee Ferliniitiin

(Giuseppe Ferlini) qodaawwan adda addaa kan argaman yoo

ta’u faayonnis keessatti argamu. Yeroo ammaatti Muziyamii

(godambaa) Barlinii fi Muunik (Jarman) keessatti argamu.

A.L.A 1844tti Arkiyoolojjistaa fi qu’ataan Kaarl Richaard

Lipsiyasin (Karl Richard Lepsius) tiin suuraaleen adda addaatii

fi odeeffannoon durii hedduun argamaniiru.

Macaafni Qulqulluu Hojii Ergamtoota 8:27 irratti akkana jedha:

“Kunoo, namichi xu’aashiin tokko itti dhufe; namichi kun

qabeenya ‘Kandaakee’ mootittii warra Itoophiyaa hundumaa

irratti abboomaa ture; inni Waaqayyoof sagaduudhaaf

Yerusaalem dhaqee ture.”

Dhuunfaan Itoophiyaanichi kun Yerusaalemiin muuduuf akka

dhaqe eerameera. Ta’iin kun A.L.A bara 37 (soddomii torba)

kan raawwatame ture. Horofaan amantii Yahuudaa kan ta’e

dhuunfaan Kuushii kun kadhannaadhaaf gara Yerusaalem

adeemee achitti yeroo hordofaa Yesusiitiin aagamu hiddi

mootummaa Aksuumii reefuu Kiristinnaa fudhatuudhaaf

woggoonni dhibba sadih (300) ishee hafaa ture. Yommuu

sanitti amantiin Yahuudaatis Aksuumiin keessa hin turre.

Aksuumoonni waaqeffattoota waaqayyoolii turan. Isuma kana

matuma isaanii hooggantoota Aksuumootaatiin kanneen

barreeffaman barruuleen dhagaa irraa hedduuwwan ni

mirkaneessu. Hojii Ergamtootaa 8:27 irratti tan eeramte

Hindaakeen (Kandaakeen) akka mootittii Meeroyii taate

hayyooliin hedduuwwan ibsaniiru. Macaafni Qulqulluun reefuu

barreeffamee osoo hin raabsamin dura A.L.A bara 79

(torbaatamii sagal) kan du’e Piliniin (Pliny) Kindaakee tan

jedhamte akka mootittii Meerowee Suudaanii turte

barreesseera. (The Dictionary of Ethiopian Biography, from

early times to the end of Zagwe Dynasty, c.1270 AD., Institute

of Ethiopian Studies, Addis Ababa University, 1975, Volume

One, Page 43)

Mootummaa Kuushii (Itoophiyaa) booda tureetiin Itoophiyaa

Kaabaa har’aatti (Tigraay) keessatti dhaloota Kiristoosiin

duratti jaarraa dhibbaa 8-7ffaatti mootummaan Da’amaat

hundeeffamee ture. Magaalaan guddoon isaa Yahaa akka ta’e

amanama. Ta’us dhaloota Kiristoosiin dura jaarraa shanaffaa

keessatti kufeera. 

Gara mandaroota (naannoolee) adda

qoqqoodamanii xixinnaaleetis jijjiirameera. Amma hojii irra kan

jiru kitaabni seenaa kan kutaa saglaffaa waa’ee mootummaa

Da’amaat akkana jechuudhaan ibsa:

“Mootummaan Da’amaat ka’uumsa Aksuumiitiin xiqqoo ishii

dursee kan ture yoo ta’u giddu-galli ishee magaala Aksuum

irraa gara Kibbaatiin dhiheenya irra ture. Waa’ee mootummaa

kanaa odeeffannoon kan argame maddeen Arkiyoolojjii

naannichaa irraa ture. Hooggantoonni Da’amaat tokko tokko

aankii siyaasaa fi amantii Arabiyaa Kibbaa kan ta’e “Mukaarib”

kan jedhame ittifayyadamaa turan. Kunis Da’amaat Arabiyaa

Kibbaa wajjiin hariiroo alaa hundeeffattee akka turte muldhisa.

Kana kan nu hubachiisu hooggantoota Da’amaat keessaa

tokko dhaloota Kiristoosiitiin dura jaarraa shanaffaa keessa

kan lafa kaaye barruulee dhagaa irraatiin (inscriptions)

yommuu ta’u Da’amaatis qarqara Galaana Diimaa irratti

Malkee (Buufata Galaanaa) Anduliis fayyadamaa

turte.” ( Ministry of Education, History Student Textbook,

Grade 9, 2005, Mega Publishing Enterprise, Addis Ababa, p.

15)

Baay’es osoo hin turin gara naannichaatti dhaloota Kiristoosiin

dura jaarraa 4ffaa-5ffaa biyya Yaman irraa baqattoonni

Arabiyaa Kibbaa (Saabaanota) dhufan. Naannicha irratti

qubatanii jiraachuu eegalan. Akka ilaalcha hayyoolii gariitti

mootummaan Aksuum dhaloota Kiristoosiin dura jaarraa

tokkoffaa keessatti godaantoota Saabaanootaatiin

hundeeffamte. Hayyooliin biroo garuu Aksuum akka sufama

hidda mootummaa Da’amaat taate amanu. ( Stuart Munro-

Hay, Aksum: An African Civilization of Late Antiquity, p. 57)

Arabiyaa Kibbaa (Yaman) irraa kanneen dhufan baqattoonni

Saabaanotaa biyya isaaniitti waaqeffatamaa kanneen turan

amantiiwwan waaqeffannaa waaqayyoolii qabatanii kanneen

dhufan yoo ta’u waaqayyooliin (taabotonni) Astaar

(Afroodaayt), Veenas (kan Giriikotaa), Waaqayyoo addeessaa

fi Waaqayyoo aduu kanneen jedhaman waaqayyooliin keessatti

argamu. Aksuumoonni waaqeffattoota taabotaa yoo ta’an

isuma kana kanneen mirkaneessan ragaaleen Arkiyoolojjii

hedduun argamaniiru. Fakkeenyaaf Yahaatti dhaloota

Kiristoosiin dura jaarraa dhibba shanaffaatti akka hojjetame

kan tilmaamamu Al-Muqaan keessatti argama. (The Church of

Ethiopia, A Panoroma of History and Spiritual, Ethiopian

Orthodox Church, Addis Ababa, 1970, pp. 1-2)

Dhaloota Kiristoosiitiin booda jaarraa jalqabaa irratti

moggaasni “Aksuum” jedhu eegalame. A.L.A jaarraa dhibba

tokkoffaatti kan barreeffame “Periplus of the Erythraean Sea”

keessatti Aksuum tuqamtee jirti. Barreeffama kana irratti

hoogganaan Aksuum Zoskaalis jedhame akka Malkee

Anduliisii bulchu tuqeera. Dhuunfaan “Zoskaalis” jedhamu kun

akka hoogganaa Aksuumii kan jalqabaa ta’e kan amanamu

yommuu ta’u mootomiinsi isaa A.L.A naanna’a 100tti ture.

(Stuart Munro-Hay, Aksum: An African Civilization of Late

Antiquity, p. 57)

Dhaloota Kiristoosiin booda jaarraa dhibba 2ffaatti Aksuum

akka qubsama mootummaa Aksuumootaa taate Toleemiin

barreesseera. (Encyclopedia Aethiopica, Volume One, page

186)

Aksuumii fi Yaman hariiroo seena-qabeessa kanneen qaban

yoo ta’an akka ibsa Insaaykilopidiyaa Itiyoopikaatti Yamaniin

keessatti bakkeewwan Jabal Hubuushii fi Waadii Hubuush

jedhaman ni argamu. Kunis walitti dhufeenya Aksuumti fi

Yamanii godhamee fudhatameera. (Encyclopedia Aethiopica,

Volume One, Page 59)

A.L.A bara 200tti Aksuum kutaa bulchiinsa ishee

babaldhifachuuf yaaduun jecha gara Arabiyaa Kibbaatti

(Yaman) Al-Ma’aafiriin humna ishee galchite. Erga gosoota

Saabaatii fi Himayar wajjiin tokkummaa uumteen booda

dabaree dabareen lamaanuu haleelte. Naannichas

gabbarchiisuu dandeette. Mootiiwwan Aksuumii “Gadarata” fi

“Azbaah” jalqaba jaarraa sadaffaa irratti (A.L.A 210tti) gara

Yamanii woraana isaanii akka duulichasan ragaaleen

Arkiiyoolojjii Yamanitti argaman mirkaneessaniiru. Yamanitti

kan argame barreeffamni dhagaa irraa “Mootichi Gadarat

Nagaashii Aksuumii fi Habashaa” jechuudhaan isa waama.

Barreeffama kana irraa akka ilaalutti Aksuumii fi Habashaan

lameenuu adda addaa ta’anii ibsamaniiru.

 

Haaluma walfakkaataa ta’een barreeffamni dhagaa irraa inni Tigiraayitti

argames “Gadara Nigusa Aksuum” jechuudhaan isa waama.

(Encyclopedia Aethiopica, Volume One, Page 174)

Aksuum kutaa bulchiisaa biyya Yamanii keessatti bulchitu

yommuu argattuu fi Malkeen Aduliis wiirtuu daldalaa oo’ituu

yommuu ta’uu eegaltutti naannicha irratti jajjabinni itti

dhageessisaa adeemte. A.L.A yeroo 260-269 jiru keessatti

hoogganaan Aksuum gara Suudaan fulla’uudhaan mootummaa

Kuushii (Itoophiyaa) magaalaa guddoo Meeroyin rukute.

Gabbarsiisus danda’e. Isheen duriin irraa jalqabee hidda

mootummaa “Kuush/Itoophiyaa” jedhamee waamamaa tureef

magaala guddoo tan turte Meeroy Aksuumiin jalatti kufte.

( Encyclopedia Aethiopica, Volume Three, Page 459)

Bulchaan Aksuum Kuushiin dabalatee (Kaasuu jedhamteetis ni

waamamaa turtee) gosoota biroowwanis gabbarsiisuu danda’eera.

 Gara biyya isaa Aksuum deebi’ee dhiheenya

Aduliisitti teessoo (barcumaa) aangoo dhagaa irraa hojjetame

irratti injifannoo isaa barreesseera. Aduliisitti taabota Ariis

jedhamuuf aarsaa godhe. Barreeffamichis akkana jedha:

“Gosoota kanneen hundaa gabbarsiisuudhaan ani bulchaa

biyya kootii isa jalqabaatii fi tokkicha qofaati. Kunis kan ta’eef

kan na dhalfate Gabbaramaan koo Araariis (taabota

Aksuumoonni waaqeffataa turan) tola naaf ooleen. Saboota

biyya koo wajjiin waldaangeffatan hundumaa gama isaatiin

(Ariisiitiin) baha irraa hanga biyya Qimam, dhiha irraa hanga

bakkeewwan Itoophiyaa fi Saasuu kutaa bulchiinsa koo jala

isaan oolfadhe. Bakka tokko tokko anumti duule. Kan biroo

irratti (adda-duroota woraana) kootii erge.” ( G.W.B.

Huntingford, the Historical Geography of Ethiopia from the

First Century A.D to 1704, page 43)

Mootichi Aksuum barreeffama armaan olitti tuqne “Kana kan

godhe zamana aangoo kootii 27ffaa irrattiidha” jechuudhaan

goolaba. Haasawa bulchaa Aksuumii isa armaan olitti tuqne

kana keessatti mootichi “Naannoolee Itoophiyaa” akka too’ate

eerameera. Naannoo kana kan too’ate Aksuumitti mootomee

woggaa 27ffaa irratti ta’uusaatiin inni tanaan dura bulchaa tan

ture biyya Itoophiyaa hin turre jechuudha. Kun immoo

Itoophiyaa jedhamaa kan jiru Aksuumiin tan dabalattu

Itoophiyaa teenya akka hin ta’in innummaan haasofni bulchaa

Aksuum ragaa biroo nuuf ta’a. Hayyooliin mootiin kun “Afiilaas

kan jedhame bulchaa Aksuumiiti” amantii jedhu kan qaban

yommuu ta’u A.L.A bara 527tti Aksuumiin kan daawwate

Manakuseen Gibxii Kosmas barreeffamicha kitaaba isaa

“Christian Topography of Cosmes” jedhame keessatti lafa

kaayeera.

A.L.A bara 330tti Mootichi Izaanaa Elaamiidaan hanga yeroo

amantii Kiristaanummaa itti fudhateetti bulchaa Aksuum

kamiinuu wajjiin walqabatee jechi “Itoophiyaa” jedhu hin

tuqamne. Mootichi Izaanaan matumti isaa barruulee

barreessise keessatti waaqeffataa taabotaa jedhaatii fi erga

Kiristaanummaa fudhateen boodas yoo ta’e mataa isaa “Ani

bulchaa Itoophiyaati” jechuudhaan Itoophiyaa har’aa hin ibsine.

Fakkeenyaaf Atsee Izaanaan osoo Kiristaanummaa hin

fudhatiniin yeroo turetti barruulee dhagaa irratti barreessise

yommuu ilaallu mataa isaa kan ibsu bulchaa naannoolee adda

addaa (mootii moototaa) godhee yoo ibsu kanneen keessaa

Aksuum, Habashaa fi Kuushiin (Kaasuu) biyyoota adda addaa

godheetiin. Akkana jechuunis ibsa:

“Izaanaan mooticha Aksuum, kan Himayar (biyya Yaman), kan

Saabaa (biyya Yaman), kan Habashaa (biyya Yaman), kan

Raaydaan (biyya Yaman), kan Saalhaan (biyya Yaman), kan

Beejaa (biyya Eritiraa), kan Kaasuu (Kuush-Suudaan) fi kan

Seymoo (Tigiraay-Indartaa), mooticha moototaa, kan hin

injifatamne ilma (taabota) Mahareem. Namoonni Beejaa

(Badawwiin) ni fincilan. Isaan woraanuudhaaf obboleewwan

teenya Sizaanaa fi Hadafaa jaratti ergine.” (Historical

Geography of Ethiopia, page 48)

Izaanaan gara aangoo osoo hin dhufiniin duratti yeroo 260-269

jiru keessatti Kuush (Kaasuun) Aksuumiif gabbartuu ta’uu ishee

armaan olitti tuqneerra. 

Ta’us Izaanaan baay’innaan mataa

isaa yommuu waamu kan ilaallu bulchiinsota isaa biroowwan

dabalatee mootii “Kaasuu/Kuush” jechuudhaan. Armaan olitti

kan eerre barreeffama isaa lugaa Gi’iiziitiin barreeffameen

Izaanaan duula namoota Beejaa irratti adeemsise yommuu

nuuf seenessu mataa isaa bulchaa naannoolee adda addaa

godhee yoo ibsu kanneen keessaayis isheen takka “Habashaa”

akka taate barreessiseera. Duuluma kana ilaalchisee lugaa

Saabaa Yamanoota duriitiin barreeffama dhagaa irraa

Epigraafik Saawuz Arabiyaatiin (Epigraphic South Arabian)

barreessiseenis mataa isaa bulchaa naannoolee adda addaa

godhee ibsa. Mootichi Izaanaan isuma duula isaa kan Beejaa

kanuma lugaa Giriikitiin (DAE4) /DAE=Deutsche Aksum

Expedition/ kan barreessise yoo ta’u qabiyyeen isaa

kanwaliigalaa tokko ta’ee maqaan “Habashaa” jedhu yeroo

jalqabaatiif hiikkaa “Itoophiyaa” jedhuun bakka buufameera.

(Huntingford, the Historical Geography of Ethiopia, pp 48-49)

Atsee Izaanaan barreeffama isaa kanaan bulchiinsota isaa

kanneen bulchu keessaa Aksuumii fi Habashaan (Barreeffama

Giriikiitiin Itoophiyaa jedhamee kan hiikkame) kan tuqaman

tokko osoo hin taane bulchiinsoota adda addaa ta’aniiti. Kunis

Aksuum bulchiinsa “Habashaa/Itoophiyaa” jedhamee kan

tuqameen alatti tan taate ta’uusaa nu hubachiisa. Kunis

“Itoophiyaa” jedhamee barreeffamicha irratti ibsaa kan jiru

Aksuumiin tan ofkeessatti dabalatte Itoophiyaa teenya akka

hin ta’in agarsiisa birooti.

Atsee Izaanaan waaqeffannaa isaa kan taabotaa dhiisee erga

Kiristaana ta’een booda A.L.A bara 356tti finciltoota

haleeluudhaaf gara Suudaan duulee Kuushiin (Kaasuu) irratti

hubaatii raawwateera. “Christian Inscriptions” jedhamuun kan

beekkamu barreeffama dhagaa irraatiin Izaanaan matumti isaa

Waaqayyoo samii (Igza Samaay) fi Waaqayyoo Dachii (Igzi’a

Biheer) jechuudhaan maqaa Gabbaramaa isaa gabbaruutuun

akka injifannoo gonfatu ibsa. 

Ergamtoota Izaanaa irratti gidiraa

dalaguu fi sababa finciluu isaaniitiin gara Nubiyaa (Kuush) akka

duules ni dubbata. “Nubiyaanonni yommuu fincilanitti gooftaa

hundaa kan ta’e humna Noobaa irratti woraana adeemsise”

jechuudhaan ibsa. Izaanaan Meeroyin keessa tan jirtu Axbaara

irratti yommuu jara dhaqqabu finciltoonni nidheessanu.

Guyyoota 23f jara ari’aa haleele. Ummatichas ciccire. Jabala

(Bidiruu) isaanii jalaa liqifamsiise. Izaanaan afaanuma isaatiin

“Magaalaa isaanii tan dhagaan hojjetamte gube” jechuudhaan

barreesseera. (Historical Geography of Ethiopia, pp 55-56)

Biyya Suudaan (Meeroyi)tti kanneen argaman ragaaleen

Arkiyoolojjii Izaanaan garas duuluu isaa mirkaneessaniiru.

Insaaklopidiyaa Itoophikaan (Insaaklopidiyaan kun

Yunivarsitiiwwan addunyaa teenyaa adda addaatiin waa’ee

Itoophiyaa kanneen qu’annoo godhaniin piroofesaroota 250

oliin kan qophaa’eedha.) jildii 3ffaa fuula 939 irratti akka lafa

kaayetti Meeroyitti kanneen argaman barreeffamonni dhagaa

irraa lamaa fi saantimaa bulchaan Aksuum Izaanaan erga

Kiristaanummaa fudhateen booda Meeroyin haleeluu isaa

mirkaneeffateera. Ragaan kun kan argame naanna’a

Piiraamidii Meeroyitti yoo ta’u kanneen lugaa Gi’iiziitiin

barreeffamanii fi “Mootii Aksuumii fi Himayar” kan jedhuun

kanneen lugaa Giriikitiin barreeffamaniidha. A.L.A bara 260-269

irraa eegalee hooggantoonni Aksuum gara

“Suudaan” (moggaasni kun jecha afaan Arabiffaa gurraacha

jedhuu irraa kan dhufeedha) duuluudhaan Kuushiin (Nubiyaa)

haleelus, akkasumas bara 356tti Izaanaan haleellaa olaanaa

irratti raawwatus Meeroy (Kuush) bifa guutumaan guututti

irradeebitee hin kaaneen kan haleelamte jaarraa dhibba 5ffaa

hoogganticha Aksuum Taazaana ta’uusaatiif ragaan

argameera. (John Garstan A. Hsayce and F.LL. Griffith, Meroe

the city of the Ethiopians, being an account of a first season’s

excavations on the site, 1909-1910, Oxford at the Claredon

Press, 1911, page 3)

Ministeerri Barumsaa kan qopheesse kan kutaa 6ffaa kitaabni

barataa Saayinsii Hawaasaa waa’ee kufiinsa magaalaa guddittii

mootummaa Meeroy akkanatti ibsa:

“Jaarraa lammaffaa irraa eegalee qaroominni Meeroy

dadhabsiifameera. Yaratiinsa qaroomina Meeroyitiif sababni

hangaftichi ka’uumsa mootummaa Aksuumii ture. Walakkaa

jaarraa 4ffaa irratti Aksuum Meeroyin weerartee magaalattis

gubuudhaan diigdee jirti. Weerara kanarraa kan ka’es

mootummaan Kuushii kan durii kufuuf danda’eera.” (Saayinsii

Hawaasaa kitaaba barataa, kutaa 6ffaa, fuula 7)

Seenaa leellifamaa tan qabaataa turte Kuush (Itoophiyaan)

hooggantoota Aksuumootaatiin hubaatii irradeddebi’uun irra

gahee fi sababa cirama bosonaa sirna lafaatiin uumameen

balaa irratti kufte. Kufaatii isheetiif akka sababa dabalataatti

kanneen tuqaman gidduu daldalli Roomaa Meeroy irraa gara

Malkee Anduliis jijjiiramuu isaatii fi gara naannichaa

baqachuun Beejaanootaa giddutti argama. (Encyclopedia

Aethiopicas, Vol. 3, page 459 and page 937)

Mootummaan Kuush (Itoophiyaan) booddeen ishee bifa

armaan olitti ilaalleen erga goolabameen booda lugaa

Giriikiitiin moggaasa “Fuulli jaraa aduudhaan kanneen

gurraachate (Itoophiyaa)” jedhu namoonni biyya alaa

mootummaa Aksuumiitiif kennuu eegalan. Kanaaf akka sababa

dabalataatti tuqamuu kan danda’u Meeroy (magaalaan

guddittiin Kuush) harka Aksuumootaa keessatti kufuu isheetii

fi hanga zamana mootummaa Atsee Kaalebitti (Dhaloota

Kiristoosiitiin booda jaarraa 6ffaa keessa) waa’ee bulchaa

naannichaa turaniif ta’uu nidanda’a. Jaarraa 6ffaa keessa

hoogganaa Aksuum kan turan Atseen Kaaleb waa’ee injifannoo

isaanii lugaa Gi’iizitiin kan barreessisan barreeffama dhagaa

irratti akka ibsanitti biyya Yamanii, Kaasuu, Nuubaan dabalatee

akka bitan ibsanii mataa ofii hoogganaa Aksuumootaa

(dabalatee) taasisanii ibsu. Jaarraa dhibba 6ffaa kana

keessatti Atseen Kaaleb matumti isaaniituu “Hoogganaa

Itoophiyaa” jedhanii of hin ibsine. (Historical Geography of

Ethiopia, pp 63-65)

Haata’u malee, Atseen Kaaleb gara Yaman Najraa duuluuf

yommuu qophaa’an A.L.A bara 520ttan gara Aksuum kan

dhufe Gibxitti Gadaamii Sinaa Qulqullittii (St. Catherine’s

Monastery) keessatti Manakusee kan ture Kosmas kitaaba isaa

“The Christian Topography of Cosmes” jedhame irratti waa’ee

Aksuum barreesseera. Kitaabicha isaa kana irratti “Qarqara

Itoophiyaa irraa maayilii lama tan fagaattu (magaalaa) Aduliis”

jechuudhaan ishee waameera. (Kosmas 550tti kitaaba isaa

kan barreesse erga Kuushiin guutumaan guututti barbadooftee

fi bibittinnoofteen booda ture.) yeroo jalqabaatiifis namoota

biyya alaatiin moggaasni “Itoophiyaa” jedhu Aksuumootaaf

kenname. Aduliis Malkee Aksuumoota akka turtes ni ibsa.(The

Christian Topography o Cosmas, an Egyptian Monk, Printed for

Hakluyt Society, London, pp 55-56)

Inumaayyuu woraanni Atsee Kaaleb gara Yaman Najraa

yommuu duuluu dhaabbatee kan arge Kosmas Aksuumiin

“Itoophiyaa” jedhee ishee waamus Atsee Kaalebin dabalatee

hooggantoota Aksuumootaa gidduu mootiin kamuu mataa isaa

“Itoophiyicha” biyya isaatis “Itoophiyaa” jedhee hin waamne.

Hanga kufiinsa mootummaa Aksuumitti kana kan muldhisu

ragaan yeroo sanirraa hanga ammaatti hin jiru. Atsee Kaalebin

dabalatee barreeffama Atsee Izaanaa irratti “Itoophiyaa” fi

“Aksuum” kan ibsaman kanneen adda addaa ta’aniiti.

Barreeffama Atsee Izaanaa irratti jecha “Itoophiyaa”

jedhuuyyuu kan argannu Giriikiin kan barreessisan (DAE4)

irratti ta’uusaa armaan olitti qaabachiisuun keenya ni

yaadatama. Walitti qabuuf hanga yeroo mootummaan

Aksuumootaa itti geeffameetti barreeffama yeroo sanitti

barraaye irratti hoogganaan Aksuumii kamuu mataa isaa

“Itoophiyaanicha” akka ta’e, akkasumas biyyi inni bulchus

“Itoophiyaa” akka jedhamtu ragaan ittiin ibse hin jiru.

Insaaykilopidiyaan Itiyoophikaa akka ibsetti biyya teenya

“Itoophiyaa” jechuudhaan ishee waamuu kanneen jalqaban

hayyoolii jaarraa 13ffaa turan.( Encyclopedia Aethiopica, Vol.

2, page 397)

Hanga ammaatti jechoonni “Itoophiyaa/Itiyoophiyaanoota”

moggaasota “Kuush/Kuushota” jedhan bakkabu’anii Macaafa

Qulqulluu Giriikii keessa akka galan ilaalleerra. Asirratti Kuushii

fi Kuushota kanneen jedhaman matama isaanii Aksuum/

Aksuumota yoo ta’an hoo? gaafiin jedhu ka’uu ni danda’a.

Ta’uusaatiinis qabxicha kallattii kanaanis ilaaluun ni mala.

Zamana mootummaa Aksuumis ta’ee booddee irratti mataa

isaa “Salamoonaawwii” jechuudhaan kan ka’e hiddi

mootummaa hooggantootaati fi lammiileen bittootaa

(ummataa) lugaa isaanii irratti qu’annaawwan godhameen

ragaalee amansiisaniin akka mirkaneeffametti Kuushota hin

turre. Sababni isaatis hooggantoota bulchiinsichaatiifi

ummaticha yeroo san irraa hanga ammaatti ummattoota

naannicha irra turanii fi argaman yommuu ilaallu dubbattoota

lugaa Gi’iizii kanneen turan dubbattoota lugaa Ag’aziyaan,

Tigiriffaa, Tigiree fi Amaariffaati. 

Isaan kunneen immoo hundinuu kan ramadaman maatii lugaa Kuushii keessatti osoo

hin taane Seemiin irraayi (Sematiikii) dha. (Lugaaleen

Itoophiyaa maatii lugaa Seemii keessatti ramadaman

Amhaaraa, Argoobbaa, Guraagee, Hararii, Silxee, Tigiriffa,

Gaafaat, Gi’iiz, Zaay, kkf dha.)

Hiddi mootummaa Salamoonaawwii mataa isaa akka

dhiheessetti mootittii Saabaa fi mooticha Salamoon (saba

Yahuudaa) irraa bu’aatii fi daddarbaa akka dhufe osoma

ta’eeyyuu Seemaatikii (Seemawa) malee Kuushawa ta’uu hin

danda’an. Sababni isaatis sabni Yahuudaa (Nagada

Yahuudaan) armaan olitti kanneen tuqneen dabalatatti damee

Seemii isaan Arabiffaa fi kanneen birootis dabalatu

keessattiidha. Itoophiyaa keessatti maatii Kuushii kanneen

ta’in gidduu hangaftoonni Oromoo, Sumaalee, Agawoo,

Sidaamaa, Affaar ni eeramu. Sabaa fi sablammooliin kunneen

immoo naannoo fi waytii “Kuushii” Macaafa Qulqulluu jedhee

tuqutti Itoophiyaa har’aa ykn immoo hidda mootummaa

Kuushii hoogganaa akka turan kan muldhisu ragaan wayiituu

hin argamne.

Itoophiyaan/Kuushiin Macaafa Qulqulluu Itoophiyaa har’aati

kan bakka bu’u osoma jedhameeyyuu ummattootaa fi

bulchiisota Itoophiyaa Kaabaa isaannan Seemii ta’anii mannaa

Oromoota, Sumaalootaa fi Affaaroota, kkf dha. Ta’uusaatiinis

kallattii qabxii kanaatiinis Itoophiyaa Macaafa Qulqulluu teenya

irraa adda tan taate ta’uusaa ni hubanna. (Lugaalee Itoophiyaa

isaannan maatii lugaa Kuushii keessatti ramadaman kanneen

armaan gadii gidduttu argamu: Affaar, Agawoo, Oromoo,

Alaabaa, Sumaalee, Sidaamaa, Konsoo, Hadiyyaa, Kambaataa,

Geediyoo, Burjii, Daraashee, Daasanach, Arbooree, Buusaa,

Iroob, Gawaadaa fi Tsemaayiidha. (History Student Textbook,

Grade 9, Mega Publishing Enterprise, Addis Ababa, 2005, page

19-20)

Gabaabumatti hanga ammaatti akka addeessinetti

“Itoophiyaan” Macaafa Qulqulluun tuqamte ykn moggaasaa

ishe kan Ibraaysixiitiin “Kuush” Itoophiyaa har’aa wajjiin

kanneen adda addaati.

“Itoophiyaa/Kuushii” Macaafa

Qulqulluu keessaa wanta biyya teenya jaalatamtuu har’aa

wajjiin walitti fidu hin jiru. Haata’u malee, dhimma moggaasaa

tasa uumame irratti hundaa’uudhaan barreessitoonni

Kiristaanaa seenaa barreessan tokko tokko Itoophiyaa har’aa

Itoophiyaa Macaaficha Qulqulluu wajjiin tokko godhuudhaan

duriirraa eegalee “Biyya Kiristaanaa” jechuudhaan seenaa

babbareechifachuu eegalan. Sanaaf immoo Kibra Nagast

(Kabajaan Moototaa) shoora olaanaa baheera. Tokko tokko

Hojii Ergamtootaa boqonnaa saddeet lakkoofsa digdamii torba

irratti “Nama Itoophiyaa” kan jedhame tuquudhaan

Kiristaanummaan gara Itoophiyaa har’aatti kan seene zamana

Ergamtootaa keessa akka ta’e godhanii barreessuu jalqaban.

Kanarraa ka’uunis “Itoophiyaan Kakuu Haaraa kessattis

tuqamtee jirti” kan jedhu goohessan. Piroofesar Edwaard

Ilundorf kitaaba isaanii “Itoophiyaa fi Macaafa Qulqulluu” jedhu

keessatti Hojii Ergamtootaa 8:27 irratti hundaa’uudhaan

yommuu ibsan:

“Hojii Ergamtootaa 8:27 irratti ‘Nama Itoophiyaa’ michuu

Kindaakee kan jedhame tajaajilaa Meeroy Kindaakeeti. Ta’us

Itoophiyaanoonni (teenyiin) duriirraa eegalanii ta’ii kana mataa

ofiitiif godhanii Kindaakee mootittii Saabaa wajjiin takka

taasisan. Dhugumatti Kindaakee Kakuu Moofaatii fi mootittii

Kibbaa gidduu hariiroon homaatuu hin jiru. Haata’u malee,

Kibra Nagast (Kabajaan Moototaa) namoota yeroo adda addaa

turan lamaan tokko taasise.” 

(Edward Ullendorf, Ethiopia and

the Bible, Oxford University Press, 1968, page 9-10)

Kunis seenaa Itoophiyaa kan ofduubaa tarkaanfii Macaafa

Qulqullaawaa (Kiristaanummaa) godhuufii akka ture Piroofesar

Edwaard Ullendorf akkanatti ibsu:

“Mootittii Saabaa fi Kindaakee tokko godhuun jaraa seenaa

Itoophiyaa (har’aa) kan ofduubaa tarkaanfii Kiristaanummaa

godhuu isa murteessaadha.” (Ethiopia and the Bible, page 10)

Gabaabumatti kan godhame Itoophiyaadhuma teenya tan

Macaafa Qulqulluu wajjiin tokko godhuudhaan gara goolabbii

“Itoophiyaan iddoolii Kiristaanaati” jedhuu gafuuf ture.

Dhugaadhaa, Itoophiyaa Kaabaa kan naannesse

mootummaalee Kiristaanawaa hundeessuun isaanii dhugaa

seena-qabeessaadha. Kan nama dinqisiisu “Itoophiyaan harka

ishee gara Waaqayyoo hiixatti” (Faarfannaa 68:31) kan jedhu

irradeddebi’amee akka dhaadannootti akka baratamu yommuu

godhamu keeyyattoonni waa’ee Itoophiyaa eeran kanneen

biroo dagatamaniiru. Tooftaan hordofan gaarii gaarii kan ta’e

keessaa luqqifataa seenaa wajjiin walitti hidhuudha wanta

ta’eef Macaafa Qulqulluu keessatti waa’ee Itoophiyaa

keeyyattoota cinaa alta’aawaatiin tuqaman eenyus jara hin

kaasu. Fakkeenyaaf Macaafni Qulqulluun akkana jedha:

“Yommus warra Itoophiyaa abdachaa turanii fi warri Gibxiin of

jajaa turan, in sodaatu in qaana’us.” (Isaayaas 20:5)

Akkasumas:- “Biyya Gibxii irratti billaan in dhufa, biyya

Itoophiyaa irras naasuun in bu’a.” (Hizqi’el 30:4)

Keeyyattoota jedhan kanniin lallabaan kamuu kaasee yommuu

irraa dubbatu hin caqafamu. Hanga ammaatti akka

addeessinetti jecha Macaafa Qulqulluu (Kakuu Moofaa)

“Kuush” jedhu “Itoophiyaa” jechuudhaan dhaloota

Kiristoosiitiin duratti waraabbiin Septuwaanjant hiike. Erga

maashiniin maxxansaa oomishameen booda ajaja mooticha

Jaamisiitiin kan qophaa’e, beekamtii fi fudhatama sadarkaa

duniyaaleessaa kan qabu Macaafa Qulqulluu Ingiliffaa irratti

“Kuush” kan jedhu guutumaan guututti hafee Itoophiyaan

bakkabuufamee dhihaate.

 Macaafni Qulqulluun kun A.L.A

1611tti addunyaa irratti yommuu raabsamu addunyaa

Kiristaanaatiif goolabbii “Itoophiyaan tan Macaafa Qulqulluuti”

jedhu uumeefii argame. Garuu Ji’ogiraafiin addunyaa,

iddoowwan Seena-qabeeyyiin Macaafa Qulqulluutii fi

beekumsi saayinsii walumaagalatti yommuu dagaagu

gaafiiwwan ka’uu jalqaban. Dogoggorichi maalirraa akka ta’e

ni beekkame. Hayyooliin hedduuwwan ragaa amansiisaa irraa

ka’uudhaan Macaafa Qulqulluu irratti biyyi “Kuush” malee tan

“Itoophiyaa” jedhamtu akka hin jirre goolabbii irra gahan.

Addunyaa irratti beekkamoolii kannneen ta’an hayyoota

Macaafa Qulqulluutiin sirreeffamee A.L.A bara 1978tti kan

maxxanfame Macaafni Qulqulluun “New International Version

(NIV” dogoggara moggaasaa uumamee ture sirreesseera.

Macaafichi Qulqulluun kun (Warabbii sadarkaa addunyaa

haara) moggaasa “Itoophiyaa” jedhu baasuudhaan gara jecha

Ibraaysixii kan durii “Kuush” deebiseera. Macaafa Qulqulluu

kana keessatti jechi “Itoophiyaa” jedhu altokkos hin tuqamne.

“Kuush” kan jedhu garuu yeroo digdamii torba keessatti

tuqameera. Fakkeenyaaf iddoo Faarfannaa 68:31 “Itoophiyaan

harka ishee gara Waaqayyoo hiixatti” jedhutti “Cush will

submit herself to God” (Psalm 68”31) ykn “Kuush mataa ishee

Waaqayyoof of bichisifti” (Faarfannaa 68:31) jechuudhaan

Kuush kan jedhu akkuma jiruun lafa kaayeera.

Macaafni Qulqulluun Ingiliffaa “Hoolii Baaybil Guud Niwus

Edishin” jedhames tarkaanfiidhuma walfakkaataa fudhateera.

Kana qofa osoo hin ta’in dachii Macaafni Qulqulluun “Kuush”

jechuudhaan waamu Ji’ograafii addunyaa har’aa irratti

(bulchiinsa ishee kan duraatiin) wanta hin jirreef dubbisaa

Macaafa Qulqulluu har’aatiif ifa akka ta’uuf (Kuushiin duraanii

bulchiinsa Suudaanii har’aa keessa wanta turteef) bakka-bu’aa

jecha “Kuush” “Suudaan” kan jedhu bakka buufameera.

Fakkeenyaaf bakka Faarfannaa 68:31 irratti “Itoophiyaan harka

ishee gara Waaqayyoo hiixatti” jedhu irratti “Hoolii Baaybil

Niwus Edishin” osoo ilaallee “The Sudanese will raise their

hands in prayer to God” (Holy Bible Good News Edition. 1992,

Psalms 68:31)

“Suudaanoonni kadhannaan harka isaanii gara Waaqayyoo

hiixatu” jechuudhaan ture kan lafa kaaye. “Za Niwu Ingilizyi

Baaybil” immoo jecha Ibraayisxii “Kuush” jedhu “Nubiyaa”

jechuudhaan hiikeera. Fakkeenyaaf “Itoophiyaan harka ishee

gara Waaqayyoo hiixatti” kan jedhu “Nubiyaan harka ishee

gara Waaqayyoo hiixatti” (Let Nubia stretch out her hands to

God) (The New English Bible, 1970, Psalms 68:31)

jechuudhaan hiikeera. Hiikkaan Macaafa Qulqulluu kan

Arabiffaa immoo jecha Ibraayisxii “Kuush” jedhu akkuma jiruun

lafa kaayeera. Fakkeenyaaf keeyyata Faarfannaa Daawit

“Itoophiyaan harka ishee gara Waaqayyoo hiixatti” irratti

“Kuush harka Isheetiin gara Allaaha hiixatti” jechuudhaan

hiikeera. Akkana jechuunis lafa kaayeera:

" ﻛﻮﺵ ﺗﺴﺮﻉ ﺑﻴﺪﻳﻬﺎ ﺍﻟﻰ ﺍﻟﻠﻪ ." ‏( ﺍﻟﻜﺘﺎﺏ ﺍﻟﻤﻘﺪﺱ: ﻣﺰﻣﺮ 68:31 )

Hanga ammaatti baldhinnaan akka ilaalletti dhimmichi kana

fakkaata. Qabxiiwwan barreeffama kanaan qaqqabaman

baay’eewwan isaanii kanneen hayyoolii giddutti yayyaa’an

ta’anis ummata baldhaaf garuu hanga ammaatti akka hin

dhihaanne godhamee tureera.

Kaayyoon mata-duree kootii “Itoophiyaa” Macaaficha

Qulqulluu (Itoophiyaa) biyya teenya wajjiin takka akka hin ta’in

mul’isuuf ture. Kanaafis ture “Itoophiyaa tamiin?” yoo jedhu

mata-durichaan kan gaafadheef. Bifa kanaan kan uumame

“Kuushii/Itoophiyaa” Macaaficha Qulqulluu adeemsi Itoophiyaa

biyya teenya jaalatamtuu har’aa wajjiin tokko taasisuu

“Itoophiyaa” fi “Itoophiyaanummaa” gara kutaa amantii

godhuutti geesseera. Mootonni Kiristaanaa duriiwwan dhimma

kana kutaa amantii isaanii godhatuun “Itoophiyaan iddoolii

Kiristaanaati” kan jedhuun biyyattii tan Kiristaanaa qofa

godhanii ijaaruudhaaf fageenya baay’ee imaluun cirama

olaanaa dhaqqabsiisaniiru. Keessattuu immoo ijaarsa

Itoophiyaa hammayyooftuu irratti kanneen harkarruu olaanaa

mataa ofii dhaaban Atsee Tewodros, Atsee Yohannis, Atsee

Minilikii fi Atsee Hayla Sillaaseen bulchiinsoota Muslimootaatii

fi Ortodooksiin ala kanneen jiran amantiiwwan biroo,

duudhaawwanii fi eenyummaa amantaawaa isaanii

macalaqsuudhaan biyyattii irratti mootummaa Kiristaanawaa

labsaniiru. Bifa ejjannoodhuma isaanii kana akka hin daaqsine

jedhuun Muslimoota naasuu biyyaatiifi balaa biyyooleessaa

godhanii faajjeessaniiru. 

Mootummaan isaaniitis Muslimootaa

fi kanneen biroo isaan Kiristaanummaa Ortodoksiitiin alatti

jiraniif iddoo kan hin qabne ture. Seerri mootummaa isaaniitis

ifumaan ifatti amantiidhuma kana kan lallabu ture. Ummaticha

irrattis ilaalchuma kana baldhinnaan gadseensisuun

ummatichis daandiidhuma kanaan adeemee ejjannoowwan

“Itoophiyaan iddoolii Kiristaanaati”, “Itoophiyaan biyya

qulqullooftuu Macaafa Qulqulluu keessatti tuqamte” jedhan

akka qabatanii fi akka tumsaa imaammata isaanii ta’an

gochoota kallattii baay’ee raawwataniiru.

Dhugaadhaa, Itoophiyaan Macaaficha Qulqulluu biyya teenya

taatus ta’uu baattus lammiin ishee tokko kan biroo

walqixxummaan fudhatee, biyyattiinis tan walwajjiinii taatee

akka ittifullaatuuf jecha bira darbee gochaan kan hojjetamu

yoo ta’e jijjiiramni fidu hammas hunda hin jiraatu.

 Haata’u malee rakkinni kan uumamu ejjannoowwan fakkaataawwan

irratti hundaa’uudhaan ejjannoo fi galmi qaccee dhiitee fi wal

hin taasifne yoo qabatameedha. Dabalataanis faallaa qabiyyee

barreeffama kaanaatiin Itoophiyaan Macaaficha Qulqulluu

biyyuma teenya ta’uu isheetiif ragaan hin shakkisifne yoo

dhihaate barreessichi fudhachuudhaaf sababni ittiin mamu

akka hin jirre ibsuuf jaalata. Boqonnaa kana kan goolabu

Itoophiyaa keessatti kijiboonni heddu iddoo argatuu isaanii

ilaalchisee dubbii Diyaaqon Tsiggee Sixootaawu dubbataniin

ta’a. Akkana jedhu:

“Ammas ni kijibna. Kijibuu keenya onneen teenya osoma

beektu gara dhugaa deebi’uudhaaf qaaniin nutti dhaga’amaa

hanga ammaatti ni kijibna. Taabotni Xiyoon Itoophiyatti,

Fannoon Gimaadaa Itoophiyatti, durbeen Maariyaam baqattee

kan jiraatte Itoophiyaa, Malaa’ikonni kan faarfatan lugaa

Gi’iizitiin, Aadam ‘Nigbara’ jedhamee kan ittiin uumame lugaa

Gi’iizitiin, Maariyaamiifis, Giyoorgifis, Abuyyeefis, Takliyyeefis

gumaacha tan kennamte Itoophiyaa, hundinuu Itoophiyaanoota

adha.” (Diyaaqona Tsiggee Sixootaawu, Nibari’a, Finfinnee,

Mana Maxxansaa Afrikaa, 1997, fuula 133)

“Seenaan sagantaa yeroo dhufuuf jiruu nuuf hin gumaachu.

Sirumaayyuu waa’ee eenyummaa mataa keenyaatii fi waa’ee

namummaa keenyaa baratamoowwanii beekumsa guuttamaa

nuuf kenna. Kanaanis nuti yeroo dhufuuf jiru haala fooyya’aa

tu’eetiin fuuldura dhaabbachuu nidandeenya.” (Robart Peen

Waaren)